難以抗拒嘅香料味道！高質印度餐廳「Anjappar Chet

同朋友傾開計，先發現好耐無食過咖哩，突然之間心癮起，想食一餐食慾滿滿嘅咖哩，除咗尖沙咀重慶大廈，喺寶勒巷仲有一間高質印度餐廳「Anjappar Chettinad Indian Restaurant」一入門口就有一股印式風情撲面而嚟，整體裝修色彩非常艷麗，裝修紅色為主，好似進入咗印度電影嘅世界咁，眼見餐廳座位非常闊落，多人聚餐都完全無問題👍 「Bamboo Biriyani」 係裝喺竹筒入面嘅炒飯💁侍應上檯嘅時候會即刻將炒飯係竹筒入面倒出嚟，飯粒係嗰種長長嘅米，各不粘黏，所以好適合炒飯，炒出嚟嘅飯粒粒分明，沾滿醬汁，而羊肉好好食完全唔膻，味道同樣係印度香料交織嘅複雜口感，異國風情飄香十里，好新奇呢✨ 「雞肉棒棒糖」 雞肉做到好似一支支棒棒糖咁，只要拎住支骨就食到原汁原味啖啖雞肉✔️ 雞肉外皮炸到好香脆，味道非常香濃，可以吱上檸檬汁食用。雖然炸雞係紅卜卜，但唔會特別辣，又會比到少少辛辣刺激感你，大家都難以抗拒呢種印度香料炸雞嘅猛烈攻勢，食唔停口😂 「薄荷雞塊」 薄荷雞同雜菜放喺鐵板上保持溫度，上檯時陣陣香氣係咁飄出嚟～雞肉用咗薄荷醬作為醃料，所以成件都係綠色嘅，雞肉大大件，肉質唔乾仲熱辣辣🔥 蔬菜同樣伴有濃濃嘅香料味，另外亦可搭配薄荷醬食用，係無論外表同內在都好特別嘅印度菜！ 「牛油薄煎餅」 簡直係呢一度嘅招牌，煎餅長過隻手臂，大大條擺上枱，視覺效果非常之澎湃🤭牛油薄煎餅嘅邊邊煎到焦香酥脆，襯熱嘅時候薄餅輕輕啪開就碎，脆到好似薯片咁，就咁單食嘅話會有少少甜味同牛油香，又或者配四種醬汁一齊食，各有千秋‼️ 「印度大蒜烤餅、黃油雞咖哩、雜菜咖哩」 我無去過印度食當地嘅咖哩，所以都好難講味道有幾正宗，但係我覺得佢哋嘅咖哩裏好好味，完全可以嚐試！有咖喱又點少得烤餅？所以我哋點咗「印度大蒜烤餅」點住嚟食～餅皮柔軟可口，好吸醬汁，用手直接撕開嚟食好惹味💯 咖喱方面我哋叫做「黃油雞咖喱」，招牌咖喱果然名不虛傳，黃油嘅香同香辣味融合得好好。而另外一道「雜菜咖哩」同樣份量十足，加入蔬菜增添自然嘅香甜味，熱辣辣加上各種香料混合埋一齊，有唔同層次嘅味道，如果唔係好飽真係想整碗飯配嚟食，不過配烤餅都一樣咁正👀 厚重嘅咖哩掛喺烤餅，一啖咬落去首先係細軟嘅大蒜烤餅，再嚟係風味濃郁嘅咖哩回味，好滿足呢🤭 「瑪薩奶茶」 印度嘅瑪薩奶茶係印度人生活嘅一部分，亦係一款將多種香料混合同茶葉一齊煮嘅印度特色茶，香氣濃烈，值得回味😆 「芒果印度奶昔」 係純奶昔無果肉嘅，芒果味嘅純香完全融入奶昔，果香濃郁，感覺芒果所有成份都打曬入去了🥭奶昔打得非常濃稠香滑，甜度好高完全唔酸，推介！ 🥢Anjappar Chettinad Indian Restaurant @anjappar.hk #印度菜#尖沙咀#咖喱#印度咖喱#hkfoodie#foodiehk#hkfood#hkig#hkfoodblog#香港美食#搵食指南#食食食#tstfood#tsimshatsui#tsimshatsuifood#芒果奶昔#餐廳推介#尖沙咀餐廳#尖沙咀好去處#食勻全世界